Let be," quod he, "it shal not be, so the ich.
Thou woldest make me kisse thin olde brech,
And swere it were a relike of a seint,
Though it were with thy foundement depeint.
But by the crois, which that Seint Heleine fond,
I wolde I had thin coilons in min hond,
Instede of relikes, or of seintuarie.
Let cut hem of, I wol thee help hem carie;
They shul be shrined in an hogges tord."
This Pardoner answered not a word;
So wroth he was, no word ne wolde he say.
"Now," quod our Hoste, "I wol no lenger play
With thee, ne with non other angry man."
But right anon the worthy knight began,
(Whan that he saw that all the peple lough)
"No more of this, for it is right ynough.
Sire Pardoner, be mery and glad of chere;
And ye, sire Hoste, that ben to me so dere,
I pray you that ye kisse the Pardoner;
And, Pardoner, I pray thee draw thee ner,
And as we diden, let us laugh and play."
Anon they kissed, and riden forth hir way.
WHAN said was this miracle, every man
As sober was, that wonder was to see,
Til that our Hoste to japen he began,
And than at erst he loked upon me,
And saide thus; "What man art thou?" quod he.
"Thou lokest, as thou woldest finde an hare,
For ever upon the ground I see thee stare.
"Approche nere, and loke up merily.
Now ware you, sires, and let this man have place.
He in the waste is shapen as wel as I:
This were a popet in an arme to enbrace
For any woman, smal and faire of face.
He semeth elvish by his contenance,
For unto no wight doth he daliance.
"Say now somwhat, sin other folk han saide;
Tell us a tale of mirthe and that anon."
"Hoste," quod I, "ne be not evil apaide,
For other tale certes can I non,
But of a rime I lerned yore agon."
"Ye, that is good," quod he, "we shullen here
Some deintee thing, me thinketh by thy chere."
LISTENETH, lordinges, in good entent, And I wol tell you verament
Of mirthe and of solas,
Al of a knight was faire and gent
In bataille and in turnament,
His name was sire Thopas.
Yborne he was in fer contree,
In Flandres, al beyonde the see,
At Popering in the place,
His father was a man ful free,
And lord he was of that contree,
As it was Goddes grace.
Sire Thopas was a doughty swain,
White was his face as paindemaine
His lippes red as rose.
His rudde is like scarlet in grain,
And I you tell in good certain
He had a semely nose.
His here, his berde, was like safroun, That to his girdle raught adoun,
His shoon of cordewane;
Of Brugges were his hosen broun;
His robe was of ciclatoun,
That coste many a jane.
He coude hunt at the wilde dere,
And ride on hauking for the rivere
With grey goshauk on honde :
Therto he was a good archere,
Of wrastling was ther non his pere,
Ther ony ram shuld stonde.
Ful many a maide bright in bour
They mourned for him par amour,
Whan hem were bet to slepe;
But he was chaste and no lechour,
And swete as is the bramble flour,
That bereth the red hepe.
And so it fell upon a day,
Forsoth, as I you tellen may,
Sire Thopas wold out ride;
He worth upon his stede gray,
And in his hond a launcegay,
A long swerd by his side.
He priketh thurgh a faire forest,
Therin is many a wilde best,
Ye bothe buck and hare,
And as he priked north and est,
I telle it you, him had almeste
Betidde a sory care.
Ther springen herbes grete and smale, The licoris and the setewale,
And many a cloue gilofre, And notemuge to put in ale, Whether it be moist or stale, Or for to lain in cofre.
The briddes singen, it is no nay,
The sperhauk and the popingay,
That joye it were to here,
The throstel cok made eke his lay,
The wode dove upon the spray
He sang ful loude and clere.
Sire Thopas fell in love-longing
Al whan he herd the throstel sing,
And priked as he were wood;
His faire stede in his priking
So swatte, that men might him wring,
His sides were al blood.
Sire Thopas eke só wery was
For priking on the softe gras,
So fiers was his corage,
That doun he laid him in that place
To maken his stede som solace,
And yaf him good forage.
"A, Seinte Mary, benedicite,
What aileth this love at me
To binde me so sore?
Me dremed all this night parde,
An elf-quene shal my lemman be,
And slepe under my gore.
"An elf-quene wol I love ywis,
For in this world no woman is
Worthy to be my make | in toun,
All other women I forsake,
And to an elf-quene I me take
By dale and eke by doun."
|