daz unser liebir brudir grave Gunthere seligir und wir betracht habin von bewegunge wegin gotlichir gnade unsirs vateren, unsir mutir, alle unsir vordern, alle unsir nochkomen und liebin wertinne und elichin gemalin, frowin Agnesin, frowin Elsin geswestere, und unsir selbis sele selikeid, und habin von dem guthe, daz uns vorlegin ist von gote, der ein geber ist alles guthes, ein selegerete gesaczt, daz ewiclichen besten und dienen sal czu troste unsir sele und alle der sele, di in kristlichim geloubin von hinnen scheidin. Daz selegerethe und di ordenunge des testamentis sal also stehe, daz man der heiligin sammenunge der closter frowin czu Arnstete alle czit io in der wochin dry tage fleisch sal gebin, an dem suntage, an dem dinstage, und an dem dornstage und uff iglichim der tage eime sal man fumff schillinge gutir Arnstetir phenninge umb fleisch gebe, daz machit io die woche fumfftzehn schillinge phenninge. Darczu da man alle wochin daz geild vone gebin sal, habin wir bewiset fumffczen marg geildes ierlichir ewigir gulde, di wir gfrihet und geeygint habin mid volbort und willen alle unsir erben, daz der czins den obgenantin clostirfrowin alle wochin czu irer phrunde, als vor geschrebin stehet in desin brive, ewiclichen diene sal und ungehindirt von alle unsirn erbin und nachkomen, und bevelen daz alle unsir erbin und nachkomen, daz si hir cze getruwelichen beholffin sint, und darcze nicht en hindirn, noch di, den wir daz bevolin habin, als verne als si vormidin wollen gotis zcorn und flüch, beroubunge ewigir froude. Auch habin wir betracht, daz vil tage in dem iare gevaln uffe der drier tage eynen, daz man biwilin nicht fleisch iszit von gebotis wegin kristlichir e, uffe di tage, wanne sich daz gebort, so sullen en di, de wir darcze geschickit habin, uff iglichin der tage einen kouffin umb funff schillinge, waz di, den wir daz bevoln habin oder hir noch bevoln wirt, allir bequemeliches dunckete den clostirfrowin uffe di czit cze irer phrunde czu gebene, dez sullin auch si dangneme si und nicht wedirspreche. Ouch hat unsir bruder grafe Gunther seligir und wir gesatzt in derselbin ordenunge unsirs testamentis und selegeretis alle den pristirn, di in der pharre czu unsir frowin czu Arnstete belehent sin, von erst deme prabiste, dem pharre, deme vicario der frue mesze, den vicarien czu sencti Alexii altare, czu sencti Nicolai, czu sencti Gangolffi, czu sencti Seligii et Gemerii, czu sti. Iohannis, czu unsir frowin altare, czu sti. Gorgin altare, sencte Anne, czu ste. Elizabeth, czu sti. Andree unde czu dez heiligin lichames altare, sal man igslichime io in dem mande einen schilling gutir phennige gebin, doch also, daz di pristere und die frowin unsir gedechtnisze, alz wir daz gesatzt habin und hir noch geschrebin in desin brive. Nu setze wir vor eine ordenunge unsir testamend also czu haldene. Di frowin in dem clostere sullin alle mandin eins uffe sulche tage, als wir darczu genand habin, hir nach in desin brive, des abindis vigilie und nun lectien singen in irme kore, unn dez morgins dez andirn tagis sele

mesze mit den pristirn und schulern singen, und an alle den tagin in iglichim mande, alz sich dit gedechtnisze gebord, sullen si mit den pristirn und schulirn, die in unse capellin tretin sullin, commendacien und bevelunge unsir sele thun, alle respons, collectin und versikele, de sich darcze geborn czu singene und cze lesene, sullen si mite singin und lesin in alle der wise, alz ab unsir licham keinwertig stunde und allir erst vorscheidin were. Daz sullin si alle czit und ewiclichin also haldin und uff igslichime der tage des begengnisze sullin ir czu dem mynstein funff und czwentzig frowin czu kore stehe czu vigilie und mesze, und beveln en daz und alle irn nachkemme, di in dem clostere sin, odir noch czu kumfftig kome, uff ire consciencie und samwiczikeid, daz sie daz almusen also sullin vordiene unsirn selin, unsir vordirn und nochkome sele cze troste, daz wir ouch mit iren briven vorsichirt von en haben genome, in denselbin iren brive si uns und allin unsin nachkome bi waren truwen und bi ire consciencien und samwiczikeid vorbrivet und gelobit habin, ewiclichin czu haldene und nimmer czu vor ruckene, und wanne si daz also nicht enhildin, uffe welchim mandin si des symig fundin wurdin, so sal man en allen in dem clostere den ganczin mandin uz, wann in den andirn manden uffe den tag dez begengniszes, von unsern unsir nachkomen, noch von deses unsirs selegeretis wegin in kein fleisch in daz clostir czu irer phrunde gebin, und daz geilt, daz man dane dar ane entheldet, sal man luttirlichin arme luthen, die dez noddorfftig sint, dorch got und unsirn selin czu troste gebin, und vor daz geilt, von den, den wir daz bevelin odir in czukunfftigen cziten bevoln wirt, dorch got usz gegebin wirdt, dez sollin si gůd recht und volle macht haben und von den clostir frowin ungestrafft blibin. Nu secze wir um di pristere, die obgenant sint, daz di ouch alle in iglichin mandin eins uffe solche tage, als wir darcze benand habin, hir nach in desin brive, dez abindis ernwirdiclichin vigilie und nun lectien in unsir capellen czu unsir frowin singin und dez morgins dez andirn tagis selemesze mit den frowin singin, und si alle sullin vor dem, er si selmesze czu singene anhebin, mid einer proceszion in unsir capellin, da unse grufft yn ist, gehen und dar inne commendacien und bevelunge thun und danne selemesze haldin in derselbin capellin unsir, unsir vordirer und nachkomn selen czu troste und daz haldin in alle der wise, alz wir daz vore umb di frowin in dem clostere vorschrebin habin in desin brive. Die commendacie und bevelunge, alz vore gedacht ist in desin brive, sal man also haldin, wan man nuhe czu kore gelud hat, uff igslichin tag unsirs gedechtniszes, so sullen die pristere und scholere vor der mesze daz respons absolve domine ectr. anhebin in dem kore und mid einer procession in unsir capellin gehen, und wane daz respons und vers uz ist, daz die frowin in dem clostere mete singen sullin, dane sullin die pristere anhebin daz gebehet odir collectin, non intres in iudicium, darnach

sal man daz respons rogamus te domine ectr. singin und dar nach daz gebehit adir collectin deus cum omnia vincit ectr., dar nach daz respons deus eterne ectr. und darnach die collectin odir gebehet fac quaesumus domine, und wanne die collecte uz ist, so sal man singin di antiphone, media vita in morte sumus ectr., danne sal man mesze anhebin und gotdechticlichen singin. Hir obir secze wir umb die pristere, probist und vicarius, odir di di von den vicariis di eltere czu belesene genant werden, wilchir in iglichim mande uffe di czit unsirs gedechtniszes des abindis czu der vigilie, dez andern morgins dar nach czu der commendacie und selenmesze nicht queme adir ern vorsumete, dem sal man uff den tag sines schillingis, als wir en vor czu geschrebin habin, nicht gebin, sundirn di, den wir daz bevolin habin adir hir noch bevolin wirt, sullin daz gelt dorch got luterlichin gebin notdorfftigin arme lutin, und wi daz geilt von den, den wir daz beveln odir hir nach bevoln wirt, uz gegebin wirt, sullen si gud recht und volle macht habin, und von den pristeren, di daz versume, ungestraffet blibin, daz sullin si alle ir iglichir besundern und alle ir nochkome alle czit und ewiclichin haldin und nimmer vorruckin, haben si uns, di utzund sint vor sich und alle ir nochkome bi ire consciencie und waren truwin gelobt, und wir beveln en und allin iren nochkome, daz si daz also haldin, als verne, alz si gotis czorn vormidin wollin, der da dicke brengit ewigin schadin. Ouch habin wir gesaczt in der ordenunge unsirs testamentis, daz di altirluthe der pharre czu unsir frowin uns und allin unsirn nochkome vier kertzen von czwelf phundin wachses haldin sullin, ewiclichin czu bederffene czu der czit unsirs begengniszes, in igslichim mandin czu der vigilie und czu der selemesze sullin si in unsir capellin obir unsir grofft steckin und di vigilie und die mesze usz bornen laszin. Hir umb habin wir gesaczt, daz man den selbin altirluthin alle iar uff sende Mertinis tag sechtzen schillinge guter Arnsteter pheninge sal ghebin, do vone si di vier kortzin sullin haldin, und io dez iares czu dem mynsten virweyt vornuwe und czu legin, daz si bi der grosze bi czwelffe phundin wachses blibin. Ouch sullin die altirluthe ewiclichin alle mandin uff iglichin tag unsirs begengniszis di grossin glockin, di czu unsir frowin ist, czu der selemesze uff ire koste lutin laszin und daz imber vorczihen noch enthalde, darüber habin wir gesaczt, daz man en ie dez iares uff den genanten tag ochte schillinge phennige ewiclichin sal gebin, da vone den knechtin, di da lutin, lonen sullin. Ouch haben wir gesatzt in der ordenunge unsers testamentis, daz di selbin altirlute ein ewig licht vor deme altere des heiligin lichames in unsir capellin vor dem heiligin sacramend unsirs herren licham, tag und nacht ewiclichin haldin sullin czu eren und czu lobe dem heiligin lichame unsirs herrn, der da keinwertig alle wege sten sal uff dem selbin unsin altere, hirumbe habe wir gesatzt, daz man den selbin alterlutin uff den egenanten Martins tag funff und czwentzig schillinge

Thür. Gesch. Qu. IV.

8

ewigis czinses gutir Arnsteter phenge sal gebin und reichin, davone si daz ewige licht haldin sullin. Gesche ouch, daz di altirlute an irkenne desir stucke, alz wir gesaczt habin, sumig wordin, so sullin di, den wir unse selegerete bevoln habin, di hir nach geschrebin stehen, gut recht und volle macht habin czu straffene und umb daz vorsumenisze czu phendene vor igslichs alz dicke daz gesche, vor einen vordung an irer eygin habe und nicht an dez gotshus habe, ane daz usz geschlossin, ab von vor warlosunge wegin odir von windis wegin daz licht vorlesche einen halbin tag odir in der nacht vorlesche und nicht entbrente odir welche wis daz were, daz man daz mit wiszene odir vorsacze nicht enlizzin, so en dorffin si darumbe kein wandil thun, und ouch daz licht, daz in unsir capellin uzinig ist und lange czit herre gewest ist, sal man mid desim lichte, daz wir gewedemet und gemacht habin, nicht enthaldin, sundirn man sal ez mite burnen laszen czu troste den selen, von den ez herkomen ist. Ouch habin wir gesaczt, daz der schulmeistir mid den schulern allin alle manden eyns uff iglichin tag unsirs gedechtniszes czu der vigilie und selemesze czu kore sin sullin, darumbe sal man dem schulmeistere uff iglichin der tage einen schilling gutir Arnsteter phenge gebin und sal daz met em haldin in allir wis, als iz um di pristere vor vorschrebin ist, ab her dar ane sumeg fundin worde, obir daz sullin en der probist und burgere ernstlichin darczů haldin, daz er daz also halde. Ouch habin wir geseczt, daz man dem kirchenere czu unsir frowin alle mandin uff igslichin tag unsirs begengniszis sechs gute Arnsteter phenge ghebin sal, hierumbe sal der kirchener, der czu den geczitin ist, den altirluthen beholffin sin mid deme, daz her an den tagin unsirs begengniszis czu der vigilie di kertzin steckin und empornen sal in unsir capellin und dez morgins czu der selemesze von der altirluthe wegin di groszin glockin czu lutene bestellin sal und die kertzin ouch uff steckin alz czu der vigilie, darczu en der probist und burgere ouch stete haldin sullin. Ouch habin wir gesaczt, daz man den pherrern czu ste. Bonifacio und czu sente Iacoffe ie dez iars uff sente Martins tag ewiclichin ie dem pherrer vier schillinge guter phennig sal gebin, hirumbe sullin si unsir, unsir vordirn und nachkomen sele alleczit an dem suntage czu der mesze und predigate gedenkin und daz volg darcze vormanen, daz sie uns kein gote gnade irwerbin. Ouch habin wir gesaczt in dese ordenunge unsirs selegeretis, daz man ewiclichin in ie dem manden eyns an dem tage unsirs gedechteniszis vier schogkin armen luthin, di dez noddorfftig sin, ie dem menschin einen phening dorch got sal gebin, unsirs brudir grafin Gunthers, unsir, unsir vordirn und nachkomen und allin gloubigin selin czu hulffe und czu troste. Czu desim selegerethe, daz man den pristirn, den altirluthin, dem schulmeistere, dem kirchenere und pherrern und den armen luthin gebin und reichin sal, alz vore geschrebin stehet, habin wir bewiset fumff und czwentzig phunt geil

dis an fumff schillinge ewigis czinses, di wir dartzo geeygend und gefrihet habin, daz si czu desime unsime selgerethe volgin und dienen sullin. Ouch habin wir hir pobin dese geschrebene czinse bewiset, driszig schillinge ouch ewigis czinses, di den closterfrowin czu deme fleische czu kouffene dienen sullin, ab an dem erstin geilde daz wir darczu bewiset habin czu kort weren odir gebrechin. Ouch haben wir gedacht umb daz man also vor unse sele gebin sal, ab sich die moncze und were andirte, so sal man daz io in der achte haldin, daz man sulche were gebin sal, daz man der were, di man danne gebt, alz vele gebin sal, daz io dem manne alz vele werde, alz man iczund gebt an den phengin, der man nu czwene und funftczig schillinge vor eine marg lotigis silbirs rechent. Nů setze wir di tage unsirs gedechteniszis, alz wir vore vorschrebin habin, daz sullin si dese tage, an dem tage sancti Bonifacii sal man czu abind vigilie, dez morgins dez andirn tages vor der messe recommendacie thun, selemesze singen und den armen luthin daz almusin gebin, alz vore geschrebin sted in desin brive, uffe desin selbin tag ist iarczit grafin Gunthers, unsirs liebin bruders. Der andere tag unsirs gedechtniszis sal sin an sende Petri und Pauli tage czu abind mit der vigilie, dez andirn tages, dar nach mit der mesze, der dritte tag an dem tage sente Petri, als er enpundin ward, daz man nennet ad vincula Petri, der verde an sente Egidii tage czu abind, der fumffte an sente Michels tage czu abinde, der sechste an sente Symonis und Iude tage czu abind, der sebinde an sente Nicol tage czu abind, der achte an dem czwelfftin tage czu abind, der nunde an unsir frowin tage lichtwie cze abind, der czende an sente Gregorii tage czu abind, der eylffte an sente Ambrosii tage czů abind und der cwelffte an sente Philippii und Iacobi tage czu abind. An den tagin allin, alz hir nach geschrebin sted, sal man des abindis vigilie und des andirn tages dar nach recommendacie thun und selemesze singin und dane den arme luten daz almusin gebin und daz also haldin ewiclichin, als daz vore merglichin vorschreben ist in desin brive. Nů unsir brudir grave Gunther selegir und wir eintrechticlichin mid volbort und willin alle unsir erbin unsir selegerethe und testament, als vore geschrebin sted, bestalt und gesaczt habin und damete uff unsere selegerethere und testamentarios gewiset habin, di alle dese vorgeschrebene czinse yn neme und alz wir bestalt habin, alz obeschrebin sted, uz sullin ghebin, darcze habin wir uz erwelet und gekorn uz alle unsirn ernwerdigen manne und stetin unsere liebin getruwin, an den wir und alle unsere vordern gantzin und gruntlichin glouben und truwe fundin habin. Hirumbe setze wir nú uff si den grostin gloubin und unsere groste gud, daz ist unsere sele, di bevele wir den ratismeistirn, den ratluthin und den rethin unsir stad Arnstede und allen irn nochkome; und wisen an de alle dese vorgeschrebin cinsze, di man uz ghebin sal umb unsere sele selikeid, di wir dartzo bewiset habin und vore geschre