Servibunt gentes, et Saba dona dabunt. Accipiens Simeon manibus quem justus utrisque,
Annis decrepitus hæc pia verba dedit :
Nunc dimitte in pace tuum servum, auctor ab alto,
Viderunt oculi jam quia vota mei ;
Quando salutare hoc merui, tua verba secundum,
Ferre manu, et visu cernere jure Deum.
O sacra virgo Dei talem generando Maria,
Per quem lumen habet plebs tenebrosa prius:
In regione umbræ mortis lux ipsa refulsit,
Admirabilis hic, consiliarius hic.
Qui Deus est fortis pater atque in secula princeps,
Imperii cujus pax sine fine manet :
Rorarunt cœli nubes, justumque pluerunt,
Quem salvatorem germine virgo dedit.
AEgyptus, labor AEthiopum, ditesque Sabæi,
Ad quem transibunt, mente sequendo Deum.
Est in quo tantum Deus, et non est Deus absque hoc,
Hic Deus absconsus, qui Deus Israel est;
Cujus Justitia est lumborum cingulum, et idem
Ejus renis adest cinctoriumque fides;
Reguli et aspidis ausa manus penetrare foramen
Ablactatus agens, nec nocet ullus ei;
Astans in signum populorum, ejusque sepulcrum
Nobile, adorandum gloria quanta tegit!
Quem dominatorem terræ misit Moabitis,
Petra ex deserti qui pius agnus adest;
quo Zacharias:
: exulta filia Sion,
Justus salvator, rex tuus ecce venit,
Ascendens asinam super, aut asinæ quoque pullum,
Et currus perdens ex Efraimo, et equum :
Unde et Micheas, Et tu, inquit, Bethleem Ephrata,
Parvis in Juda millibus ipsa manes.
Egredietur, qui dominatur in Israel, ex te,
Egressusque potens ejus ab initio ;
Lumen sanctorum in splendoribus, ex utero quem
Ante et luciferum progenuitque pater:
Livores sanans nostros livore beato,
Et veteres maculas sanguinis amne lavans :
O virgo insignis, mater pia, nobile semen,
Quam Deus implevit totius orbis ope,
Quæque creatorem meruisti ventre tenere,
Et generare Deum concipiente fide;
Mundatura novo partu de crimine mundum,
Atque sacro fœtu progenitura Deum :
Humano generi genuit quos Eva dolores,
Curavit genitus, virgo Maria, tuus ;
Peccati jaculo defixa in stirpe cicatrix,
Ulcera nulla gerit, nec sua signa patent:
Succus amarus enim vetiti de cortice ligni,
Stante redemptoris de cruce dulce sapit.
Sub pomi specie mors tunc de fronde pependit,
Nunc tuus est uterus, hinc cibus, inde salus;
Fructu sancta pio renovasti tempora rerum,
Lucidiorque dies te generante nitet:
Post tenebras solem tua revocat alvus in orbem,
Cum domini jubaris irradiavit apex;
In te habitans mundi lumen statione corusca,
Floruit interius per tua membra Deus;
Nunc vivax fulgor penetrans et ad ima profundi,
Orbem alit, astra regit, tartara luce replet;
Cujus mundi uno est hæc machina tecta pugillo,
Clauditur in fibris casta puella tuis ;
Supportans fabricata fabrum atque humana tonantem,
Virgula radicem facta creantis opem.
Qualiter illa novum tenuerunt viscera lumen,
Quod decus intus erat, quisve honor inde foras?
Gaudia quanta sinus hilaris tuus ille vehebat,
Cum tua membra premens plus relevabat onus?
Tum genetrix de fasce levis, de prole salubris
Rem splendoris habens, lux neque pondus erat;
Auxilium de flore gerens, de fruge levamen,
Et cœli panem spica novella ferens;
Cujus stella erat, et sol matutinus in alvo,
Infra arcam abscondens fulgida luna jubar;
Anniculum portans agnum, antiquumque gigantem,
Deque tribu Juda qui leo fortis erat;
Cornua producens vitulus ceu rhinocerotis,
Arduus, elatis naribus alta fremens.
Regulus atque aspis, cedunt cui cuncta venena :
Vipera, chersydros, seps, draco, cenchris, hydra.
Parvulus ipse puer persona vetusta dierum,
Egressus cujus stat sine principio;
Cujus diffusa in labiis est gratia florens,
Insignis forma præ genitis hominum :
Cujusque est oriens ex alto nomen honoris,
Qui nos, lumen agens, visitat in tenebris;
Qui venit de Edom, de Bosra veste cruenta,
Pulcher, sanguineus, candidus, atque ruber,
Calcaturus erat qui torcularia solus,
In cruce pendendus, membra cruore lavans. Unde sibi mista est stola candida, tincta rubore, Quem post, anteve quem, non Deus ullus erit; Cujus transcendit sacra magnificentia cœlos, Cuncta tegens palma sidera, rura, freta. Quis te tunc sensus, domini pia mater, habebat, Cum tibi talis erat foetus honore novus? Præmia quanta uterum implebant et gaudia pectus, Cœlorum artificem cum tua ferret humus? O forma radians, dic virgo, putasne videbas Angelicos cursus ire redire novos? Militiam coeli cum te servare vicissim
Sentires animo, sæpe levata manu.
Que circa te acies, vel quando iter ire parares,
Millia prægressus concomitando tuos?
Quid Michael faceret ductor, sub principe celso,
Quid gereret Gabriel nuncius ille sacer?
Qualiter aut Raphael occursum impenderet almæ,
Te portante, Dei dum putat esse thronum ;
Credo alter cuperet plantis substernere palmas,
Ille excussa ala solveret ipse viam;
Duceret iste auras, ne te gravis ureret æstus,
Ille levans pinnas, vertat ut imber aquas;
Iste ad frena manum retinens, ne sarcina lapset,
Neu pes offendat, pendula turba volat :
Quot vigiles turmæ, cum te sopor altus haberet,
Solaque dormitans tot vigilare dares ?
Sidereo obsequio meritis dignissima virgo,
Cum te divinis cingeret ala choris.
Cujus honore sacro sol ipse tremisceret ortum,
Lunaque sub pedibus quæreret esse tuis, Artificique suo se machina subderet orbis,
Ac miraretur per tua membra Deum. O Virgo excellens, vincens super omnia matres, Quam genus erexit, cui Deus alta dedit! Cujus fructus adest, et flos non perdit honores, Quæ nato es genetrix, et tibi virgo manes. Felix quæ generi humano sub tartara lapso, Ad cœlos facta es sors, via, porta, rota; Aula Dei, ornatus paradisi, gloria regni,
Hospitium vitæ, pons penetrando polos; Arca nitens, et theca potens gladii bis acuti, Ara Dei assurgens, luminis alta Pharos; Celsa super cedros, et vasta cacumina montis, Subque tuis plantis et rota solis adest; Virgineo cœtu dux, sexu prima secundo Prælata astrigeris sola puella choris; Figmentum figuli super omnia vasa decorum, Atque creaturæ fulgida massa novæ ; Candelabrum pulchrum verbi capiendo lucernam, Quam formam sculpsit tam super astra faber; Ornans Hierusalem sanctam speciosa venustas, A facie templi vas in honore Dei ; Exuperans portas Sion splendore corusco, Stans merito fidei, gemma superba throni; Ore diem jaculans, radios a fronte, sagittas Luminibus rutilis, lumen honore rotans; Sidereum speculum, illustris domus omnipotentis, Vultibus ex illis fulgura clara ferens;
Nomen honoratum benedicta Maria per cevum,
|