Lava quod est sordidum,

Riga quod est aridum,

Sana quod est saucium,

Flecte quod est rigidum,
Fove quod est frigidum,
Rege quod est devium.

Da tuis fidelibus

In te confidentibus

Sacrum septenarium, Da virtutis meritum,

Da salutis exitum,

Da perenne gaudium. Amen.

HYMN FOR THE DEAD.

Dies iræ, dies illa

Solvet sæclum in favillâ,

Teste David cum Sibyllâ.

Quantus tremor est futurus,
Quando Judex est venturus,
Cuncta strictè discussurus!

Tuba mirum spargens sonum
Per sepulchra regionum,
Coget omnes ante thronum.

Mors stupebit, et natura,

Cum resurget creatura,
Judicanti responsura.

Liber scriptus proferetur,
In quo totum continetur,
Undè mundus judicetur.

Judex ergo cum sedebit,
Quidquid latet apparebit,
Nil inultum remanebit.

Quid sum miser tunc dicturus? Quem patronum rogaturus, Cùm vix justus sit securus?

Rex tremendæ majestatis,
Qui salvandos salvas gratìs,
Salva me, fons pietatis.

Recordare, Jesu pie,
Quòd sum causa tuæ viæ,
Ne me perdas illâ die.

Quærens me sedisti lassus,
Redemisti crucem passus,
Tantus labor non sit cassus.

Juste judex ultionis,
Donum fac remissionis,

Ante diem rationis.

Ingemisco tanquam reus,
Culpâ rubet vultus meus:
Supplicanti parce, Deus.

Qui Mariam absolvisti,
Et latronem exaudisti,
Mihi quoque spem dedisti.

Preces meæ non sunt dignæ,
Sed tu, bone, fac benignè,
Ne perenni cremer igne.

Inter oves locum præsta,
Et ab hædis me sequestra,
Statuens in parte dextrâ.

Confutatis maledictis,
Flammis acribus addictis,
Voca me cum benedictis.

Oro supplex et acclinis,
Cor contritum quasi cinis,
Gere curam mei finis.

Lacrymosa dies illa
Quâ resurget ex favillâ

Judicandus homo reus.
Huic ergo parce Deus.

Pie Jesu, Domine, Dona eis requiem. Amen.

COMPLAINT TO THE VIRGIN.

Stabat mater dolorosa,

Juxta crucem lacrymosa,

Dum pendebat filius:
Cujus animam gementem,
Contristantem, et dolentem,
Pertransivit gladius.

O quam tristis et afflicta
Fuit illa benedicta,
Mater unigeniti :

Quæ mærebat, et dolebat,
Et tremebat, cum videbat
Nati pœnas inclyti.

Quis est homo qui non fleret
Christi matrem si videret
In tanto supplicio?
Quis posset non contristari
Piam matrem contemplari
Dolentem cum filio?

Pro peccatis suæ gentis
Vidit Jesum in tormentis,

Et flagellis subditum :
Vidit suum dulcem natum:
Morientem, desolatum,

Dum emisit spiritum.

Eja, mater, fons amoris,
Me sentire vim doloris

Fac, ut tecum lugeam.
Fac ut ardeat cor meum,
In amando Christum Deum,
Ut sibi complaceam.

Sancta mater, istud agas,

Crucifixi fige plagas

Cordi meo validè :

Tui nati vulnerati,

Jam dignati pro me pati,
Pœnas mecum divide.

Fac me verè tecum flere,
Crucifixo condolere,

Donec ego vixero:

Juxta crucem tecum stare,

Te libenter sociare

In planctu desidero.

Virgo virginum præclara,
Mihi jam non sis amara

Fac me tecum plangere:
Fac ut portem Christi mortem,
Passionis ejus sortem,

Et plagas recolere.