Et nos perennis oh quibus
Salutis auctor nasceris,
Faustum triumphali juvat
Ornare concentu Diem.
Qui natus es de Virgine
Jesu, tibi sit gloria,
Cum Patre, cumque Spiritu,
In sempiterna secula.
QUID, obstinata pectora,
Verbo Dei resistitis?
Qui vos Deo plenus docet
Hunc destinatis funeri.
Omnes in unum sæviunt,
Saxis gravant truces manus,
Hunc particeps Saulus necis
Per omnium dextras petit.
Quid hoc! repente panditur
Stellata Coeli Regia,
Ad dexteram Patris videt
Sublime stantem Filium.
Non deseris, Dux, Militem, Quem, Christe, spectans roboras:
Stas arbiter certaminis,
Futurus ipse præmium.
Deo mori sub judice
Pugnantis est victoria:
Dum grando saxorum pluit,
Nil sentit affixus polo.
Mens nempe largo vivida
Torrente lucis ebria,
Nil corporis memor sui
Jam se beatis inserit.
Qui natus es de Virgine,
Jesu, tibi sit gloria,
Cum Patre, cumque Spiritu, In sempiterna secula.
Jussu Tyranni pro fide
Pulsus, Johannes, exulas:
Fertur volatu libero
Mens celsa supra sidera.
Illic revelat se tibi
Qui mortuus vivit Deus;
Agnus salutis hostia,
Et morte devictâ Leo.
Arcana te vatem docet
Regni sui mysteria,
Pandit cruore martyrum
Ubique spargendam fidem.
Da, Christe, nos tecum mori,
Tecum simul da surgere:
Terrena da contemnere,
Amare da celestia.
Sit laus Patri, laus Filio,
Qui nos, triumphatâ nece,
Ad astra secum dux vocat,
Compar tibi laus, Spiritus.
SALVETE, flores Martyrum,
In lucis ipso lumine
Quos sævus ensis messuit,
Ceu turbo nascentes rosas.
Vos prima Christi victima,
Grex immolatorum tener,
Aram sub ipsam simplices
Palma et coronis luditis.
Quid proficit tantum nefas?
Quid crimen Herodem juvat?
Unus tot inter funera
Impune Christus tollitur.
Inter coævi sanguinis
Fluenta solus integer,
Ferrum quod orbabat nurus
Partus fefellit virginis.
Qui natus es de Virgine
Jesu, tibi sit gloria,
Cum Patre, cumque Spiritu,
In sempiterna secula.
MOLLES in agnos ceu lupus,
Amens Tyrannus irruit;
Et destinat promiscuâ
In strage Christum perdere.
Cunæ redundant sanguine
Sed in Deum frustra furit :
Unum petit tot mortibus
Mortes tot unus effugit.
Matres, querelis parcite :
Quid rapta fletis pignora?
Agnum salutis obsidem
Denso sequuntur agmine.
Qui natus es de Virgine
Jesu, tibi sit gloria,
Cum Patre, cumque Spiritu,
In sempiterna secula.
FELIX dies, quam proprio
Jesu cruore consecrat!
Felix dies, quâ gestiit
Opus salutis aggredi.
Vix natus ecce lacteum
Profundit infans sanguinem:
Libamen est hoc funeris,
Amoris hoc præludium.
Intrans in orbem, jam Patris
Mandata jussus exsequi,
Statum præoccupat diem,
Et quâ potest, fit Victima.
Quo Christus ictu læditur,
Lex abrogata concidit :
Et incipit lex sanctior,
Mansura semper caritas.
Tu Christe, quod non est tuum,
Nostro recide pectore;
Inscribe nomen, intimis
Inscribe legem cordibus.
Qui natus es de Virgine,
Jesu, tibi sit gloria,
Cum Patre, cumque Spiritu,
In sempiterna secula.
|