APPENDICE ET PIECES JUSTIFICATIVES. Page 68, ligne 12. MESSIEURS LIEUTENANT DE MAIEUR ET ESCHEVINS DE SAINCT-OMER, A SAINCT-OMER. Messieurs, J'ai cherge de Monseigneur le conte de Reux vous escripre que envoyes, incontinent expraes douze tonnyaulx de pouldre et autant de boulletz que avez une fois furny sy en avez tant. Toute fois fault que en gardés quelque provision s'il venoit quelque chose. Le convoy viendra avecques les Englois quy sont de nouvyau loués. Le bas chemin de Renty de nuit et qu'il soient bien sur leur garde. Je vous prie toujours faire bon guet, et s'il y a quel ung de mes gens des vieulx demeurés à S'-Omer, s'yl ne sont malades me les renvoier. J'en escrips au sieur de Gonnyes. Je pense pour nouvelles que ne partirons sy tost du camp, vous savez la prinse de Hesdin. Je vous prie de vostre costé scavoir de se qui se passe en vostre quartier à tant Messieurs feray fin à ceste, me recommandant de fort bon cœur à vous, priant le créateur qu'il vous doint sa grache. Du camp de Hesdin se XXVI de juing anno XV LII, de par Vostre confrère et bien bon amy, FRANCHOIS DE COCHI. MESSIEURS LIEUTENANT DE MAYEUR ET ESCHEVINS DE LA VILLE DE SAINCT-OMER. Messieurs, dernièrement quant partis de S'-Omer, ne vous advisay point la cause quy est que par le commandement de Monseigneur le conte du Roux, eulx cherge amener quelque pouldre et farynes en le lieu de Renty et me tenir ichy jusques qu'il me mandera aultres nouvelles. Parquoy vous prye puis que c'est le commandement du maistre me tenir pour excusé de se que ne puis pour cest heure vaquier aulx affaires de la ville, ou j'espère y retourner de brief, car, je pense que nos ennemys se facheront de tenir camp par se tamps ichi. Je eulx le jour d'hier nouvelles de Hesdin comment il ne sont encorres bougiet de fillièvres et pense qu'il délibèrent à quoi il emploieront leurs forches, car le tamps a diverty beaucoup de leur propossition. Nostre camp lequel se va se mestre sus, et sera demain ou après au champs, qui sera cause mestre de liane au vin des Franchois. Atant, Messieurs, aprez vous avoir recommandé affectueusement faire bon ghiet durant mon absenche et vous prier avoir de voz nouvelles s'il y a quelque chose d'importansse qu'il surviengne, prieray le créateur qu'il vous doint sa grache, me recommandant tousiours de bien bon cœur à icelle. De Renty se IX de décembre. Vostre prest vous faire plaisir et amistié. Page 68, ligne 12, en note. MES TRÈS CHIERS ET BONS AMIS LES MAIEURS ET ESCHEVINS DE LA VILLE DE S-OMER. Très chiers et bons amis, suyvant ce que vous avez escript, je vous prie que à toute diligence vous m'envoiez le reste de tous les bouletz qui sont à S'-Omer servant aux pièces d'artillerye que j'ay icy, car pour le service de l'Empereur est besoing les avoir soudainement. Et lez envoyez droit à Renty, duquel |